आप्रवासन
किएभ नजिकैको डिपोमा रातभरि रुसले ड्रोन आक्रमण गर्दा विस्फोटक पदार्थ रहेको डिपो वरपरका कम्तीमा ३७ जनाको मृत्यु भएको अधिकारीहरूले शनिवार बताएका छन् ।
राजधानीको पश्चिमी उपनगर नजिक रहेको उक्त डिपोमा ‘विस्फोटक वस्तुहरू’ भण्डारण गरिएको पाइएको युक्रेनी अभियोजकहरूले बताएका छन् ।
राष्ट्रपति भोलोदिमिर जेलेन्स्कीले वस्ती नजिक गोलाबारुद राखिनु गलत भएको बताएका छन् ।
उनले एक्समा लेखेका छन्, “गोलाबारुद घर वा अन्य आवासीय क्षेत्र नजिक भण्डारण गर्नु हुँदैन र सकिँदैन । जसले भण्डारण गर्न लगाए वा दिए, उनीहरूले आफ्ना निर्णयहरूको लागि जबाफदेही हुनुपर्छ ।”
रुस र युक्रेन दुवैले हालका महिनाहरूमा एक अर्कामाथि लामो दूरीको आक्रमण तीव्र बनाएका छन्, जसले द्वन्द्वलाई थप हिंसात्मक बनाएको छ । सन् २०२२ मा मस्कोको आक्रमणपछि नागरिक हताहतको सङ्ख्या उच्च विन्दुमा पुगेको छ ।
एएफपीका संवाददाताहरूले राजधानीको पश्चिमी उपनगरमाथि उठेको ठुलो कालो धुवाँको स्तम्भ देखेको र अधिकारीहरूले सयौँलाई यस क्षेत्रबाट खाली गरिएको बताएका रिपोर्ट गरेका छन् ।
विस्फोटले वरपरका आवासीय क्षेत्रहरूका साथै वृद्ध र अपाङ्गता भएका व्यक्तिहरूको हेरचाह गृहलाई पनि क्षति पुर्याएको राष्ट्रपति जेलेन्स्कीले बताए ।
किएभ क्षेत्रका गभर्नर तिमुर त्काचेन्कोले टेलिग्राममा भने, “आक्रमणमा छिमेकी नगर दिनित्रिभ्काका उपप्रमुखसहित कम्तीमा ३७ जनाको मृत्यु भएको छ ।”
“उद्धारकर्मी र सबै सम्बन्धित सेवाले आक्रमण स्थलमा आफ्ना नियमित कामहरू जारी राखिरहेका छन्,” उनले भने ।
डिपो किएभको पश्चिमी बाहिरी क्षेत्रको मिला सहरमा अवस्थित थियो ।
अधिकारीहरूले यो सैन्य वा नागरिक सुविधा हो भन्ने विषयमा जानकारी गराएनन् ।
आपराधिक लापरबाही
युक्रेनी अभियोजकहरूले घटनाबारे अनुसन्धान सुरु गरेको बताएका छन् ।
“स्थानीय समय अनुसार अगस्ट २८ को साँझ ८ः१० बजे एउटा मानवरहित हवाई यान (ड्रोन) मिला सहरको एउटा उद्योगको परिसरमा खस्यो वा प्रहार गरियो,” युक्रेनका महाअभियोजकको कार्यालयले भनेको छ ।
“उद्योग परिसरमा ठुलो आगो लाग्यो र विस्फोट सुरु भयो,” कार्यालयले जारी गरेको विज्ञप्तिमा थपिएको छ ।
अभियोजक कार्यालयले अनुसन्धान ‘उद्योगको परिसरमा विस्फोटक वस्तु र सामग्री भण्डारणको वैधता’ र नाम नखुलाइएको मालिकसँग ‘आवश्यक अनुमति र स्वीकृति’ छ कि छैन भन्ने कुरामा केन्द्रित हुने बताएको छ ।
युक्रेनी प्रधानमन्त्री सर्गीए कोरेत्स्कीले जुलाईमा किएभ नजिक गोलाबारुद डिपोमा भएको अघिल्लो घातक आक्रमणपछि पनि अझै ‘पाठ’ नसिकिएको भन्दै विस्फोटक पदार्थ भण्डारण गर्ने निर्णय र घटनाप्रति दुःख व्यक्त गरे ।
उक्त अनुसन्धानले आवासीय भवनहरूको नजिक हुने नियमहरू पालना नगरेको राज्यको स्वामित्व रहेको कम्पनीको यसमा गम्भीर कमजोरीहरू देखाएको थियो ।
“युक्रेनमा रुसले गरेको पूर्ण स्तरको आक्रमणको पाँचौँ वर्षमा बारम्बार उही गल्ती गर्नु आपराधिक लापरबाही हो,” उनले टेलिग्राममा भने ।
उनले भने, “यसमा कुनै अपवादबिना सबै जिम्मेवार व्यक्तिले कडा सजायको सामना गर्नुपर्छ ताकि यस्ता अवस्थाहरू फेरि कहिल्यै हुनेछैनन् । ”
युक्रेनी वायुसेनाका अनुसार रुसले शुक्रबार रातिदेखि शनिवार बिहानसम्म युक्रेनमाथि कम्तीमा दुई मिसाइल र २६७ ड्रोन प्रहार गरेको थियो।
