‘वास्तविक शत्रु’ विरुद्ध एकजुट हुन खाडी राष्ट्रका शासकलाई खामेनीको सन्देश
आप्रवासन
इरानका सर्वोच्च नेता मोज्तबा खामेनीले खाडी क्षेत्रका मुस्लिम राष्ट्रका शासकलाई एकजुट भएर आफूहरूले सामना गरिरहेको ‘वास्तविक शत्रु’ विरुद्ध उभिन आग्रह गरेका छन् । इस्लामिक एकता सप्ताहका अवसरमा खामेनीले आफ्नो टेलिग्राम अकाउन्टमार्फत लिखित सन्देश जारी गर्दै यस्तो सन्देश दिएका हुन् ।
मुस्लिम राष्ट्रबिचको विभाजनले उनीहरूका विरोधीलाई फाइदा पुग्ने सन्देशमा उनले बताएका छन् । मुस्लिम देशबिच एकता, विभिन्न क्षेत्रमा सहकार्य र पारस्परिक सुरक्षाका लागि सहयोग आवश्यक रहेकोमा पनि उनले जोड दिएका छन् ।
मुस्लिमहरूबिच जानाजान वा अनजानमा विभाजन सिर्जना गर्ने जोसुकैले इस्लामका शत्रुलाई सहयोग पुर्याइरहेको पनि खामेनीले बताएका छन् । मुस्लिम राष्ट्र एकताबद्ध भएको भए प्यालेस्टिनीहरू अहिलेको जस्तो ‘असहाय’ अवस्थामा हुने थिए कि थिएनन् भन्ने प्रश्न समेत उनले गरेका छन् ।
उनले विशेष गरी खाडीका अरब शासकलाई लक्षित गर्दै इस्लामको झन्डामुनि खाडीका जनता र सरकार एकताबद्ध भएको भए ‘पहिचान विहीन दुस्साहसीहरू’ ले उनीहरूको भूमि र सम्पत्तिमाथि आँखा लगाउने हिम्मत गर्ने थिए कि थिएनन् भनेर प्रश्न गरेका छन् ।
‘मुस्लिम देशका शासकहरू, विशेष गरी पश्चिम एसिया र खाडी क्षेत्रका देशलाई मेरो जोडदार र बारम्बारको सुझाव छ—आफ्नो वास्तविक शत्रुलाई पहिचान गर्नुहोस्, उसको योजना बुझ्नुहोस् र त्यसको सामना गर्नुहोस्,’ खामेनीले भनेका छन् । अमेरिका–इजरायलको हवाई आक्रमणमा परी आफ्ना पिता तथा यसअघिका सर्वोच्च नेता आयतोल्लाह अली खामेनीको मृत्यु भएपछि मोज्तबा खामेनी सर्वोच्च नेता बनेका हुन् ।
करिब ६ महिनाअघि भएको उक्त आक्रमणमा घाइते भएपछि उनी सार्वजनिक रूपमा देखिएका छैनन् । खामेनीको पछिल्लो आह्वान शुक्रबार इरानी जनतालाई दिएको उनको सन्देशसँग पनि मेल खान्छ । त्यसमा उनले सामाजिक एकतामा असर पार्ने गतिविधि रोक्न निर्देशन दिँदै राष्ट्रिय तथा जनताको मनोबल कमजोर पार्ने अभिव्यक्तिबाट बच्न अधिकारीहरूलाई आग्रह गरेका थिए ।
