जन्तर–मन्तर प्रदर्शन प्रकरण :  निशु आजादका बुबालाई न्याय माग्दै सीजेपी नेता प्रहरी कार्यालय पुगे

जन्तर–मन्तरमा भएको प्रदर्शनका क्रममा घाइते भएका निशु आजादका बुबा सञ्जयलाई न्याय दिलाउन माग गर्दै कक्रोच जनता पार्टी (सीजेपी) का नेता तथा कार्यकर्ता दिल्लीको संसद् मार्ग प्रहरी कार्यालय पुगेका छन् ।

सीजेपीका प्रवक्ता सौरभ दास, सह–संयोजक आशुतोष रांका लगायतका नेता तथा कार्यकर्ता पटेल चोकबाट संसद् मार्ग प्रहरी कार्यालयतर्फ पुगेका हुन् । उनीहरूले सञ्जयमाथि भएको भनिएको आक्रमणमा संलग्न व्यक्तिलाई तत्काल पक्राउ गर्न र घटनामा कडा कानुनी कारबाही अघि बढाउन माग गरेका छन् ।

सीजेपीका सह–संयोजक रांकाले घटनामा दिल्ली प्रहरीले पर्याप्त कारबाही नगरेको आरोप लगाए । उनका अनुसार जन्तर–मन्तरमा भएको प्रदर्शनका क्रममा सञ्जयको टाउकोमा गम्भीर चोट लागेको थियो । सीजेपीले घटनालाई गम्भीर अपराध भन्दै आक्रमणमा संलग्न व्यक्तिविरुद्ध हत्या प्रयासको मुद्दा चलाउनुपर्ने माग गर्दै आएको छ ।

के हो निशु आजाद प्रकरण ?

निशु आजादले जुलाईमा जन्तर–मन्तरमा भएको प्रदर्शनमा सहभागिता जनाएकी थिइन् । यसै सिलसिलामा उनका बुबा सञ्जयमाथि आक्रमण भएको थियो । घटनामा सञ्जयको टाउकोमा गम्भीर चोट लागेको र उनलाई उपचारका क्रममा धेरै टाँका लगाउनुपरेको निशुले बताउँदै आएकी छन् ।

निशुका अनुसार घटनापछि प्रहरीमा प्रारम्भिक उजुरी दर्ता भए पनि डेढ महिनाभन्दा बढी समय बितिसक्दा समेत आरोपी विरुद्ध प्रभावकारी कारबाही भएको छैन । यही विषयलाई लिएर उनले प्रहरीसँग न्यायको माग गर्दै आएकी छन् ।

यसबिच यस घटनामा ‘आक्रमणकारी’ मानिएका स्वतन्त्र भारद्वाजको एउटा भिडियो सामाजिक सञ्जालमा सार्वजनिक भएको छ । भारद्वाजले आफूलाई हिन्दुत्वसम्बन्धी सामग्री बनाउने इन्फ्लुएन्सरका रूपमा प्रस्तुत गर्ने गरेको बताइएको छ ।

भिडियोमा उनले सञ्जयमाथि भएको आक्रमणबारे बोलेको सुनिन्छ । उनले सञ्जयको टाउकोमा गम्भीर चोट लागेको र ६० वटा टाँका लगाइएको दाबी गरेको बताइएको छ । यद्यपि, उक्त भिडियोमा गरिएको दाबीको स्वतन्त्र पुष्टि भने भएको छैन ।

चन्द्रशेखर आजाद पनि प्रहरी कार्यालयमा

सीजेपी नेताहरूलाई समर्थन गर्न आजाद समाज पार्टी (कांशीराम) का अध्यक्ष चन्द्रशेखर आजाद पनि संसद् मार्ग प्रहरी कार्यालय पुगेका छन् । उनले निशु आजाद र उनका बुबा सञ्जयका लागि न्याय माग्दै भइरहेको अभियानमा समर्थन जनाएका हुन् ।

प्रहरी कार्यालयबाहिर सुरक्षा व्यवस्था कडा पारिएको थियो । सीजेपीका नेताहरूले आरोपीलाई तत्काल पक्राउ गर्न, घटनामा हत्या प्रयासको मुद्दा दर्ता गर्न तथा सबै गम्भीर कानुनी धाराहरू लागू गर्न माग गरेका छन् ।

यस प्रकरणमा कांग्रेसनिकट विद्यार्थी संगठनले पनि निशु र उनको परिवारको पक्षमा उभिएको बताएको छ । जन्तर–मन्तरमा भएको प्रदर्शन प्रश्नपत्र लिकविरुद्ध विद्यार्थीहरूको आक्रोशसँग सम्बन्धित थियो । संगठनले प्रदर्शनमा सहभागी निशुका बुबामाथि आक्रमण भएको र आरोपीले नै सार्वजनिक रूपमा घटनाबारे बोलेको दाबी गर्दै प्रहरीको भूमिकामाथि प्रश्न उठाएको छ ।

सीजेपीले भने घटनामा संलग्न व्यक्तिलाई पक्राउ गरी निष्पक्ष अनुसन्धान र कडा कानुनी कारबाही सुनिश्चित नभएसम्म आन्दोलन जारी राख्ने सङ्केत गरेको छ ।