इन्डोनेसियामा भीषण आगलागी, बालबालिकासहित ११ जनाको मृत्यु
आप्रवासन
इन्डोनेसियाको सेन्ट्रल पपुवा प्रान्तस्थित पानियाईमा सोमबार मध्यरातपछि भएको भीषण आगलागीमा परी ६ बालबालिकासहित ११ जनाको मृत्यु भएको छ । आगलागीका कारण कम्तीमा ४० वटा पसल तथा घर जलेर नष्ट भएका छन् ।
स्थानीय समयअनुसार सोमबार मध्यरातपछि बजार क्षेत्रमा आगो लाग्न सुरु भएको थियो । सुरुमा एउटा क्षेत्रमा देखिएको आगो तीव्र गतिमा फैलिँदै आसपासका पसल तथा घरहरूमा पुगेको थियो ।
आगोलाई नियन्त्रणमा लिन दमकल र पानीको फोहोरा प्रयोग गरिए पनि आगलागी तीन घण्टाभन्दा बढी समयसम्म जारी रहेको प्रहरीले जनाएको छ । प्रहरी प्रवक्ता हेनरी जे. मानुरुङका अनुसार घटनास्थलको निरीक्षणका क्रममा ११ जनाको शव फेला परेको थियो ।
मृतक सबैको शरीरमा जलेको घाउ देखिएको उनले बताए । मृत्यु हुनेमध्ये पाँच जना वयस्क र ६ जना बालबालिका रहेका छन् । मृतक बालबालिकाको उमेर २ देखि ९ वर्षसम्म रहेको प्रहरीले जनाएको छ ।
आगलागीको कारण भने अहिलेसम्म खुल्न सकेको छैन । घटनाबारे अनुसन्धान भइरहेको र आगलागी कसरी सुरु भयो भन्ने पत्ता लगाउने प्रयास भइरहेको अधिकारीहरूले बताएका छन् ।
बजार क्षेत्र र आसपासका घर तथा पसलहरू एक अर्कासँग निकै नजिक र बाक्लो रूपमा निर्माण गरिएका कारण आगो नियन्त्रणमा लिन अग्नि नियन्त्रकलाई कठिनाइ भएको प्रहरीले जनाएको छ । प्रहरी प्रवक्ता मानुरुङले आगोको तीव्रता र घर तथा पसलहरू एक अर्कासँग टाँसिएका कारण आगो नियन्त्रणमा लामो समय लागेको बताए ।
घटनास्थलमा संरचनाहरू बाक्लो रूपमा रहेकाले आगो एउटा भवनबाट अर्को भवनमा छिटो फैलिएको अनुमान गरिएको छ । अग्नि नियन्त्रकहरूले दमकल र पानीको फोहोरा प्रयोग गर्दै आगो नियन्त्रणमा लिने प्रयास गरेका थिए ।
इन्डोनेसियामा पछिल्लो समय आगलागीका ठुला घटनाहरू भइरहेका छन् । यसअघि डिसेम्बरमा राजधानी जकार्ताको सेन्ट्रल जकार्तास्थित सात तले कार्यालय भवनमा भएको आगलागीमा २२ जनाको मृत्यु भएको थियो ।
