प्रशान्त महासागरमा अमेरिकाले डुबायो इक्वेडरको पाँचौं डुंगा

सेनाले लागुऔषध तस्करीमा संलग्न रहेको आशंका गरिएको इक्वेडरको अर्को एउटा डुंगालाई पनि अमेरिकाले प्रशान्त महासागरमा डुबाएको छ । अमेरिकी दक्षिणी कमान्डका अनुसार उक्त डुंगा समुद्रमा लागुऔषध तस्करीका लागि प्रयोग हुने तैरिरहेको इन्धन केन्द्रका रूपमा काम गरिरहेको थियो ।

यो डुंगा इक्वेडरको आपराधिक समूह लस चोनेरोससँग जोडिएको अमेरिकाको दाबी छ । डुंगामा रहेका मानिसहरूलाई बाहिर निकालेर इक्वेडरका अधिकारीहरूलाई जिम्मा लगाउने अमेरिकी सेनाले जनाएको छ । सार्वजनिक गरिएको भिडियोमा सैनिकहरूले डुंगामा प्रवेश गरेको, हेलिकप्टर उडेको र त्यसपछि प्रहार गरी डुंगा डुबाइएको देखाइएको छ । नाम सार्वजनिक नगरिएको यो डुंगा पछिल्लो दुई साताभन्दा कम समयमा अमेरिकी सेनाले निशाना बनाएको पाँचौँ डुंगा हो ।

यसअघि मारिया क्यान्डेलारिया नामको माछा मार्ने डुंगासहित ओएम२ र लस त्रेस हर्मानोसलाई पनि अमेरिकी कारबाहीमा निशाना बनाइएको थियो । तीमध्ये केही डुंगाका चालकदलले आफूहरू डुबाइएको बताएका छन् । मारिया क्यान्डेलारियामा रहेका २६ जना चालकदलका सदस्यलाई इक्वेडरको नौसेनाले फेला पारेको थियो । उनीहरू आइतबार मान्टा बन्दरगाह पुगेका थिए । कोन्क्विस्टा–२ का ८ जना मछुवारे पनि फेला परेका छन् । अमेरिकाले यी सबै डुंगालाई लस चोनेरोससँग जोडेको छ ।

अमेरिकाले उक्त समूहलाई विदेशी आतंकवादी संगठनका रूपमा वर्गीकरण गरेको छ ।पछिल्लो एक वर्षभन्दा बढी समयदेखि क्यारिबियन र प्रशान्त क्षेत्रमा अमेरिकी सरकारले ६८ वटा जहाज र डुंगामाथि कारबाही गरेको छ । यी घटनामा कम्तीमा २२७ जनाको मृत्यु भएको छ ।