यमनमा हुथी विद्रोहीका ४० भन्दा बढी ठेगानामा हवाई आक्रमण, होर्मुज स्ट्रेटमा जहाजहरूमाथि हमला
आप्रवासन
मध्यपूर्वमा तनाव बढ्दै गएको बेला यमनका हुथी विद्रोहीको नियन्त्रणमा रहेका क्षेत्रहरूमा ४० भन्दा बढी हवाई आक्रमण भएका छन् । एएफपी समाचार एजेन्सीका अनुसार यी आक्रमणहरूमा यमनका महत्वपूर्ण क्षेत्रसहित धेरै इलाकाहरूलाई निशाना बनाइएको छ ।
बिबिसी फारसीका अनुसार यी क्षेत्रहरूमा हुथी विद्रोही र साउदी समर्थित सरकारी बलहरूबीच भीषण लडाइँसमेत भएको देखिएको छ। यसअघि पनि यमनका हुथी र साउदी नेतृत्वको सैन्य गठबन्धनले लगातार एक–अर्काका ठेगानालाई निशाना बनाउँदै आएका थिए ।
यसैबीच, फारसको खाडी र होर्मुज स्ट्रेट नजिकै धेरै जहाजहरूमा आगलागी भएको र क्षति पुगेको खबर आएको छ । समुद्री व्यापारमा निगरानी राख्ने एक ब्रिटिस एजेन्सीका अनुसार संयुक्त अरब इमिरेट्सको रसिद बन्दरगाहबाट २४ समुद्री माइल उत्तर(पश्चिममा लंगर हालेर बसेको एउटा जहाज एकतर्फ झुकेको छ । यो सम्भवतः जहाजभित्र पानी भरिएको संकेत हो । यसअघि उक्त जहाजलाई निशाना बनाइएको खबर आएको थियो। यद्यपि, ब्रिटिस एजेन्सीले यो घटनाको सूचना तेस्रो पक्षले दिएको जनाएको छ ।
जहाजहरूको निगरानी गर्ने अर्को एक ब्रिटिस समुद्री संस्थाले पनि फारसको खाडी क्षेत्रमा धेरै जहाजहरूमा आगलागी भएको बताएको छ । होर्मुज स्ट्रेट भएर जाने प्रयास गरिरहेका २० वटा जहाजमाथि आक्रमण गरेको इरानको दाबी लगत्तै यो रिपोर्ट बाहिर आएको हो ।
यसैबीच, दुबईको समुद्री क्षेत्रमा भएको एक तेल ट्यांकर दुर्घटनामा परी जहाजका चालक दलका एक सदस्यको मृत्यु भएको छ। पेनिनसुला शिपिंग कम्पनीले दुबईको जलक्षेत्रमा जिब्राल्टरको झण्डा भएको एक ट्यांकरसँग जोडिएको दुर्घटनामा चालक दलका एक सदस्यको ज्यान गएको घोषणा गरेको छ ।
यता, इराकबाट प्राप्त रिपोर्ट अनुसार बुधबार इराकको क्षेत्रीय जलक्षेत्रमा पनामाको झण्डा भएको एक ट्यांकरलाई ड्रोन आक्रमणको निशाना बनाइएको थियो। उक्त ट्यांकरमा इराकको २० लाख ब्यारेल इन्धन तेल लोड गरिएको थियो । रोयटर्सले इराकी बन्दरगाहका अधिकारीहरूको हवाला दिँदै देशको उद्धार डुङ्गाहरूले ‘न्यु एन्ड्रीज’ नामक ट्यांकरमा लागेको आगोलाई नियन्त्रणमा लिइसकेको जनाएको छ।
