युद्धविरोधी रुसीलाई मतदान गर्न याशिनको आह्वान

निर्वासित रुसी विपक्षी नेता इल्या याशिनले यही महिना हुने विधायी निर्वाचनमा राष्ट्रपति भ्लादिमिर पुटिनको सत्तारूढ दल ‘युनाइटेड रसिया’ विरुद्ध मतदान गर्न विश्वभर रहेका युद्धविरोधी रुसी नागरिकलाई आह्वान गरेका छन् ।

सेप्टेम्बर २० को दिउँसो मतदान केन्द्रमा पुगेर सत्तारूढ दलविरुद्ध मतदान गर्न आग्रह गर्दै उनले युद्धको विरोध जनाउन सामूहिक मतदान अभियान सञ्चालन गरिएको बताए । युद्धविरोधी रुसी नागरिक एकै समयमा मतदान केन्द्रमा पुगेर लामबद्ध भए आफूहरू कति सङ्ख्यामा छन् भन्ने विश्वले देख्न सक्ने उनको भनाइ छ । निर्वाचनको नतिजामा भने कुनै शङ्का नरहेको उनले बताए ।

रुसको निर्वाचन प्रक्रिया कडा नियन्त्रणमा रहेको र विगतका निर्वाचनमा धाँधली, दबाब तथा विपक्षी गतिविधिमाथि प्रतिबन्ध लगाइएको आरोप लाग्दै आएको छ । युक्रेनमाथि रुसको आक्रमणपछि पुटिनका आलोचक र राजनीतिक प्रतिद्वन्द्वीमाथिको दमन झन् बढेको छ । गत महिना रुसी सर्वोच्च अदालतले युद्धविरोधी दल याब्लोकोलाई समेत निर्वाचनमा सहभागी हुन रोक लगाएको थियो । त्यसैले आफूहरूले यसलाई वास्तविक निर्वाचनका रूपमा नलिएको याशिनले बताए ।

बर्लिनमा गत जुनमा स्थापना भएको ‘पिसफुल रसिया’ पार्टीका नेता याशिनले युक्रेनमाथिको आक्रमण अन्त्य गर्न र नागरिक अधिकारको पक्षमा विभिन्न विपक्षी समूहलाई एकताबद्ध गर्ने प्रयास भइरहेको बताए । पार्टी निर्वाचनमा प्रत्यक्ष सहभागी नभए पनि युद्ध र पुटिनको शासनप्रतिको असन्तुष्टि व्यक्त गर्ने अवसर अभियानले दिने उनको भनाइ छ ।

सन् २०२२ मा युक्रेनमाथिको रुसको आक्रमणको आलोचना गरेपछि जेल परेका याशिन दुई वर्षपछि पश्चिमसँगको कैदी आदानप्रदानमार्फत रिहा भएका थिए । हाल बर्लिनमा निर्वासनमा रहेका उनले भविष्यमा अवसर आए आफू रुस फर्कने पहिलो व्यक्ति हुने बताए । युद्ध कहिले, कसरी र कुन सर्तमा अन्त्य हुन्छ भन्ने कुराले आफ्नो स्वदेश फर्कने समय निर्धारण गर्ने उनको भनाइ छ ।

निर्वाचनपछि रुसमा तनाव बढ्न सक्ने चेतावनी दिँदै याशिनले पुटिनले आगामी वसन्त वा गर्मीयाममा युक्रेनमा ठूलो आक्रमणका लागि तीन लाखदेखि पाँच लाख मानिस परिचालन गर्न सक्ने दाबी गरे । “पुटिन गम्भीर वार्ताका लागि तयार हुनुहुन्छ भन्ने कुनै सङ्केत छैन, बरु तनाव बढाउने तयारीका धेरै सङ्केत छन्”, उनले भने ।

सन् २०२२ मा पुटिनले करिब तीन लाख रिजर्भ सैनिकको आंशिक परिचालन गरेका थिए । त्यसपछि दशौँ हजार सैन्य सेवायोग्य पुरुषले देश छाडेका थिए । क्रेमलिनले भने नयाँ सैन्य परिचालनको योजना रहेको दाबी अस्वीकार गर्दै आएको छ ।

याशिनले नेटोविरुद्ध उक्साहट हुन सक्ने सम्भावनासमेत औँल्याएका छन् । युक्रेनले पनि निर्वाचनपछि रुसले थप सैनिक परिचालन गर्न सक्ने चेतावनी दिएको छ । अमेरिकी थिङ्क ट्याङ्क ‘द इन्स्टिच्युट फर द स्टडी अफ वार’ ले समेत मस्कोले नयाँ सैन्य परिचालनका लागि आवश्यक अवस्था तयार पारिरहेको देखिएको बताएको थियो ।