दक्षिण कोरियामा रोजगारीका लागि अनिवार्य ईपीएस भाषा परीक्षामा यो वर्ष पास हुने नेपालीहरू सन् २०२७ मा मात्रै कोरिया जान पाउने भएका छन्। ईपीएस कोरिया शाखाका अनुसार उत्पादन क्षेत्रमा आवेदन दिएका ६७ हजार २९५ र कृषि तथा पशुपालन क्षेत्रमा ३५ हजार जनाका लागि भाषा परीक्षाको कार्यतालिका सार्वजनिक गरिएको छ।

एचआरडी र ईपीएस कोरिया शाखाले संयुक्त रूपमा सञ्चालन गर्ने पहिलो चरणको परीक्षा आगामी मङ्सिर १ गतेबाट सुरु हुनेछ। पहिलो चरणमा उत्पादन क्षेत्रमा आवेदन दिएका कामदारहरू सहभागी हुनेछन्। कृषि तथा पशुपालन क्षेत्रको परीक्षा भने त्यसपछि सञ्चालन गरिनेछ। यस वर्षको परीक्षामा करिब १ लाख ३ हजार आवेदन परेको छ र सम्पूर्ण परीक्षा सक्न चार महिना लाग्ने अनुमान गरिएको छ। दैनिक ८०० देखि १००० जनासम्मको परीक्षा लिइनेछ। एक सिफ्टमा २०० जनाका दरले दिनमा चारदेखि पाँच सिफ्ट सञ्चालन हुनेछ। डिसेम्बरको अन्त्यमा क्रिसमस र नयाँ वर्षका कारण एक साता परीक्षा स्थगित हुने जनाएको छ। शाखाका निर्देशक बिन्दा आचार्यका अनुसार यो परीक्षा सन् २०२७ का लागि हो र यसले पुरानो रोस्टरमा रहेका कामदारहरूलाई कुनै असर पार्दैन। हाल करिब १५ हजार जना युवाहरू भाषा परीक्षा पास गरेर कोरिया जाने प्रतीक्षामा छन्, जसमा १,५०० जना यसअघि कोरियामा काम गरेर फर्किएका हुन्।

शाखाका सूचना अधिकारी राजकिशोर साहका अनुसार यो वर्षका परीक्षार्थीमध्ये करिब ५,३०० जना मात्रै कोरिया जान पाउनेछन् — ३,५०० जना उत्पादन क्षेत्रमा र १,८०० जना कृषि तथा पशुपालन क्षेत्रमा।

सन् २००८ बाट सुरु भएको ईपीएस प्रणालीअन्तर्गत हाल ४० हजारभन्दा बढी नेपाली दक्षिण कोरियामा कार्यरत छन्। ईपीएस अन्तर्गत रोजगारीका लागि १८ देखि ३९ वर्षका नेपालीले कोरियन भाषा परीक्षा पास गर्नुपर्नेछ र उनीहरू गैरकानुनी रूपमा कोरियामा नबसेको, स्वास्थ्य र आचरणका मापदण्ड पूरा गरेको प्रमाणित हुनुपर्छ।