मध्यपूर्वमा चर्किएको युद्धले वैदेशिक रोजगारीमा जान लागेका नेपाली श्रमिक गम्भीर संकटमा परेका छन्। उडान अनिश्चित र श्रम स्वीकृति रोकिएपछि हजारौं युवा अलपत्र परेका छन् भने करिब २ हजार भिसा रद्द हुने अवस्थामा पुगेको छ।

त्रिभुवन अन्तर्राष्ट्रिय विमानस्थलमा विदेश उड्ने तयारीमा रहेका धेरै नेपाली अन्योलमा छन्। साउदी, कतार, यूएईलगायत देश जान लागेका श्रमिकहरू उडान कहिले हुन्छ भन्ने स्पष्ट जानकारी नपाउँदा तनावमा छन्। केही श्रमिक टिकट बोकेर विमानस्थल धाइरहेका छन् भने कतिपय घरमै प्रतीक्षामा छन्।

युद्ध सुरु भएपछि सरकारले साउदी अरेबिया, यूएई, कतार, कुवेत, बहराइन, ओमान, इराक, यमन, जोर्डन, लेबनान, टर्की र इजरायलसहित १२ देशका लागि नयाँ श्रम स्वीकृति अस्थायी रूपमा रोक्यो। यस निर्णयले वैदेशिक रोजगारीका लागि तयार भइसकेका युवाहरूलाई प्रत्यक्ष असर पारेको छ।

वैदेशिक रोजगार व्यवसायी महासंघका अनुसार श्रम स्वीकृति बन्द हुँदा करिब २ हजार भिसा रद्द हुने जोखिममा छन्। यसले श्रमिकको लगानी डुब्ने र रोजगारी गुम्ने अवस्था सिर्जना भएको छ।

यद्यपि, दबाबपछि सरकारले साउदी, यूएई, कतार, ओमान, यमन, जोर्डन र टर्कीका लागि पुनः श्रम स्वीकृति खुला गरेको छ। यसले पहिलेदेखि काम गरिरहेका र बिदाबाट फर्किने श्रमिकलाई केही राहत दिएको छ। तर पहिलो पटक जाने श्रमिकहरू भने अझै रोकिएका छन्।

यसबीच युद्धकै क्रममा यूएईमा भएको ड्रोन आक्रमणमा एक नेपालीको ज्यान गएको छ भने २१ जना घाइते भएका छन्। हाल मध्यपूर्वमा १७ लाखभन्दा बढी नेपाली कार्यरत रहेका छन्, जसको सुरक्षा थप चुनौतीपूर्ण बनेको छ।

सरकारले उद्धार र समन्वयका लागि ‘इमर्जेन्सी रेस्पोन्स टिम’ गठन गरी विशेष उडान सञ्चालन गरिरहेको छ। विभिन्न उडानमार्फत सयौं नेपालीलाई स्वदेश फर्काइएको छ भने थप उद्धारको तयारी जारी छ।

युद्धको जोखिमका बाबजुद पनि रोजगारी गुम्ने डरले धेरै नेपाली विदेश जान आतुर देखिएका छन्। सरकार भने अवस्थाको निरन्तर अनुगमन गर्दै परिस्थिति सहज भएपछि मात्रै पूर्ण रूपमा श्रम स्वीकृति खोल्ने तयारीमा रहेको जनाएको छ।