स्पेनमा रेल दुर्घटना : ६८ जनाको मृत्यु, तीन दिन राष्ट्रिय शोक घोषणा

युरोपको आधुनिक इतिहासकै सबैभन्दा दर्दनाक रेल दुर्घटनामा कम्तीमा ६८ जनाको मृत्यु हुनुका साथै दर्जनौँ घाइते भएपछि स्पेनमा तीन दिनको राष्ट्रिय शोक सुरु भएको छ। 

उद्धारकर्मीहरूले शक्तिशाली फ्लडलाइटको सहयोगमा रातभर धातुका डब्बाहरू काटेर पीडितहरूको खोजी गरेका छन्। दुर्घटनामा ज्यान गुमाएका धेरैको पहिचान अझै हुन बाँकी छ।

मड्रिडबाट सेभिलतर्फ गइरहेको रेल बुधबार बिहान लिकमा रोकिएर बसेको अर्को रेलसँग ठोक्किएर भएको उक्त भयानक दुर्घटनाको कारणबारे अधिकारीहरूले अनुसन्धान गरिरहेका छन्। प्रधानमन्त्री पेड्रो सान्चेजले पूरै स्पेन शोकमा डुबेको बताउँदै मानिसहरूको जीवन तहसनहस भएको र परिवारहरू बिछोडिएकाले यो पीडा अत्यन्तै गहिरो रहेको उल्लेख गरेका छन्। 

स्पेनको गृह मन्त्रालयका अनुसार उद्धार कार्यका लागि सयौँ सुरक्षाकर्मी र प्राविधिक परिचालन गरिएको छ। ड्रोन तथा हेलिकप्टरको प्रयोग गरी पीडितहरूको खोजी र भग्नावशेष हटाउने काम भइरहेको छ।

स्पेनका यातायात मन्त्री ओस्कर पुएन्तेका अनुसार निजी रेल सञ्चालक ‘इरियो’ द्वारा सञ्चालित र १४७ जना यात्री सवार रहेको उक्त रेल कम्प्युटर प्रणालीमा आएको खराबीका कारण लिकमै रोकिएको थियो। कुनै प्रणालीमा खराबी आउँदा मड्रिडस्थित २४ सै घण्टा सक्रिय रहने नियन्त्रण कक्षले त्यसको जिम्मेवारी लिने गर्छ। 

तर नियन्त्रण कक्षले गति सीमा नै नतोकी रेलहरूलाई पुनः अघि बढ्न निर्देशन दिने अस्वाभाविक निर्णय गरेको मन्त्री पुएन्तेले बताए। मड्रिडका रेल नियन्त्रक र चालकहरूबीच भएको अडियो रेकर्डिङबाट अगाडिको रेल रोकिइरहेको अवस्थामा नै पछाडिको तीव्र गतिको रेललाई अघि बढ्ने अनुमति दिइएको देखिएको छ।

इरियो कम्पनीका अनुसार ३९७ जना यात्रु बोकेको स्पेनको सरकारी रेल कम्पनी ‘रेन्फे’को रेलले आफ्नो रेललाई पछाडिबाट ठक्कर दिएको थियो। ठक्करको उच्च बलका कारण रेलका धेरै डब्बाहरू लिकबाट खसेर भीरतिर खसेका थिए। 

प्रत्यक्षदर्शीहरूले मानिसहरू रोइरहेका र रगताम्मे भएका, यात्रुहरू आफ्नै सिटमा च्यापिएका र डब्बाहरूमा धुवाँको मुस्लो फैलिएको देखेको बताएका छन्, जसमध्ये एउटा डब्बामा आगोसमेत लागेको थियो।

गत जनवरीमा कोर्डोबानजिकै तीव्र गतिको रेल दुर्घटना हुँदा ४६ जनाको ज्यान गएको घटनापछि स्पेनले यसै वर्ष दोस्रो ठुलो रेल दुर्घटना भोग्नुपरेको भन्दै प्रधानमन्त्री सान्चेजले यसलाई अस्वीकार्य भनेका छन्। जनवरीको दुर्घटना पनि बुधबारको दुर्घटना भएकै रेलमार्गमा तर अझै दक्षिणतर्फ भएको थियो।