म्यानमारमा विस्थापितको शिविरमा हवाई आक्रमण, १२ जनाको मृत्यु

आप्रवासन आप्रवासन

म्यानमारको पश्चिमी राज्य राखाइनमा गृहयुद्धका कारण विस्थापित भएका मानिसहरू बस्दै आएको शिविरमा सेनाले गरेको हवाई आक्रमणमा कम्तीमा १२ जनाको मृत्यु भएको छ भने १८ जना घाइते भएका छन् ।

शनिबार प्रत्यक्षदर्शी र उद्धारकर्मीले दिएको जानकारीअनुसार राज्यको राजधानी सितवेबाट उत्तरपूर्वमा पर्ने पोन्नाग्युन टाउनसिपस्थित ‘ब्यार ला’ विस्थापित शिविरमा शुक्रबार साँझ आक्रमण भएको हो ।

आक्रमणमा पाँच वर्षीय बालकसहित १२ जनाको मृत्यु भएको ‘फ्युसिन यिन ख्विन फाउन्डेसन’का अध्यक्ष खाइन हेन हतेतले पुष्टि गरेका छन् । घाइते १८ जनाको उपचार भइरहेको छ ।

आक्रमणमा आफ्नी छोरी, काकी र आमालाई गुमाएकी २७ वर्षीया चित सु वाईले लडाकु विमान अचानक आएर बम खसालेको बताइन् । उनका अनुसार आक्रमणपछि घटनास्थलमा शव छरपस्ट अवस्थामा देखिएका थिए ।

उक्त शिविरमा विस्थापितहरू विगत चार वर्षदेखि बस्दै आएका थिए । सेनाको आक्रमणपछि शिविरका बाँसका घरहरू भत्किएका छन् भने घरायसी सामान र कपडाहरू छरपस्ट भएका छन् ।

सन् २०२१ मा सेनाले सत्ता कब्जा गरेपछि म्यानमारमा गृहयुद्ध चर्किएको हो । प्रजातन्त्र समर्थक र जातीय अल्पसङ्ख्यक सशस्त्र समूहहरू सेनाविरुद्ध लडिरहेका छन् ।

पश्चिमी तटीय राज्य राखाइनमा जातीय सशस्त्र समूह आराकान आर्मीको प्रभाव छ । यस क्षेत्रमा सेनाले नाकाबन्दी लगाउनुका साथै निरन्तर हवाई आक्रमण गर्दै आएको छ ।

द्वन्द्व अनुगमन गर्ने संस्था ‘एक्लेड’का अनुसार म्यानमारमा गृहयुद्ध सुरु भएयता विभिन्न पक्षका गरी एक लाखभन्दा बढी मानिसको मृत्यु भइसकेको छ ।