मनामा। बहराइन सरकारले देशमा सम्भावित सुरक्षा खतरा रहेको भन्दै नागरिक तथा विदेशी नागरिकलाई सतर्क रहन र नजिकैको सुरक्षित स्थानमा जान आग्रह गरेको छ। बहराइनको गृह मन्त्रालयले आइतबार एक सुरक्षा चेतावनी जारी गर्दै सबैलाई शान्त रहन, सरकारी निर्देशन पालना गर्न र आधिकारिक सञ्चारमाध्यमबाट मात्रै सूचनाहरू लिन अनुरोध गरेको हो।

गृह मन्त्रालयले सामाजिक सञ्जाल एक्समार्फत दुईवटा छुट्टाछुट्टै सुरक्षा चेतावनी जारी गरेको थियो। मन्त्रालयले सम्भावित खतराको अवस्था रहेकाले नागरिक तथा बहराइनमा बसोबास गर्ने विदेशी नागरिकलाई आफ्नो सुरक्षालाई प्राथमिकता दिन र नजिकैको सुरक्षित स्थानमा जान भनेको छ।
मन्त्रालयले चेतावनी जारी गरे पनि सम्भावित खतराको प्रकृति, जोखिम हुन सक्ने स्थान वा घटनासँग सम्बन्धित विस्तृत विवरण भने सार्वजनिक गरेको छैन। सर्वसाधारणलाई अनावश्यक त्रास नफैलाउन, शान्त रहन र अपुष्ट सूचनामा विश्वास नगर्न पनि आग्रह गरिएको छ।
बहराइनले यसअघि सेप्टेम्बरपछि पहिलोपटक यस्तो राष्ट्रव्यापी सुरक्षा चेतावनी जारी गरेको हो। पछिल्लो चेतावनी मध्यपूर्व क्षेत्रमा बढिरहेको सुरक्षा तनावका बीच आएको हो।
इरान–अमेरिका तनावबीच बहराइनमा सुरक्षा सतर्कता
बहराइनमा सुरक्षा चेतावनी जारी हुनुको पछाडि अमेरिका र इरानबीच बढिरहेको तनावलाई पनि प्रमुख कारणका रूपमा हेरिएको छ। बहराइनमा अमेरिकी नौसेनाको पाँचौँ फ्लीटको मुख्यालय रहेको छ। यसले बहराइनलाई खाडी क्षेत्रमा अमेरिकी सैन्य गतिविधिका लागि महत्त्वपूर्ण केन्द्र बनाएको छ।
यसअघि नोभेम्बर १३ मा अमेरिकी सेनाले बहराइनतर्फ आउँदै गरेका दुईवटा इरानी ड्रोन रोकेको जनाएको थियो। अमेरिकी सेनाका अनुसार ती ड्रोन रोक्ने क्रममा कुनै मानवीय क्षति वा भौतिक नोक्सानी भएको थिएन।
यसैबीच, इरानको इस्लामिक रिभोलुसनरी गार्ड कर्प्स (आईआरजीसी) ले बहराइनस्थित अमेरिकी सैन्य आधारमा ड्रोन आक्रमण गरेको दाबी गरेको छ। इरानी सञ्चारमाध्यमका अनुसार उक्त आक्रमणमा अमेरिकी हवाई सुरक्षा प्रणालीको राडारलाई लक्षित गरिएको थियो। तर, इरानको पछिल्लो आक्रमणसम्बन्धी दाबीलाई अमेरिकी वा बहराइनका अधिकारीहरूले स्वतन्त्र रूपमा पुष्टि गरेका छैनन्।
बहराइनमा साइरनसमेत बजाइएको अन्तर्राष्ट्रिय सञ्चारमाध्यमले जनाएका छन्। यद्यपि, सरकारले जारी गरेको सुरक्षा चेतावनी र इरानले गरेको आक्रमणको दाबीबीचको सम्बन्धबारे आधिकारिक रूपमा विस्तृत जानकारी सार्वजनिक भएको छैन।
बहराइनमा रहेका विदेशी नागरिकलाई सतर्क रहन आग्रह
बहराइनमा ठूलो संख्यामा विदेशी नागरिक रोजगारी तथा अन्य प्रयोजनका लागि बसोबास गर्दै आएका छन्। यस्तो अवस्थामा सरकारले जारी गरेको सुरक्षा चेतावनीलाई गम्भीरतापूर्वक लिन आवश्यक देखिन्छ।
बहराइनमा रहेका नेपाली नागरिकले पनि त्यहाँको गृह मन्त्रालय तथा सम्बन्धित सरकारी निकायबाट जारी हुने आधिकारिक सूचना र सुरक्षा निर्देशन पालना गर्नुपर्ने हुन्छ। सम्भावित जोखिमको अवस्था रहेकाले अपुष्ट समाचार तथा सामाजिक सञ्जालमा फैलिने हल्लाका आधारमा निर्णय नगर्नु उपयुक्त हुन्छ।
बहराइनको गृह मन्त्रालयले भने अवस्था सामान्य बनाउन तथा सार्वजनिक सुरक्षालाई प्राथमिकता दिन सबै नागरिक र विदेशी बासिन्दालाई सहयोग गर्न आग्रह गरेको छ।