मलेसियामा वैदेशिक रोजगारीमा रहेका नेपालीसहित सबै विदेशी श्रमिकलाई अस्थायी रोजगार पास अर्थात् PLKS (Pas Lawatan Kerja Sementara) सम्बन्धी नियम कडाइका साथ पालना गर्न चेतावनी दिइएको छ।

मलेसिया अध्यागमन विभागले जारी गरेको सूचनाअनुसार PLKS को सर्त उल्लङ्घन गर्नु अध्यागमन ऐन 1959/63 र अध्यागमन नियम 1963 अन्तर्गत गम्भीर अपराध मानिनेछ।

सूचनाअनुसार PLKS धारकहरूले रोजगारदाताको अनुमति बिना कम्पनी वा मालिक परिवर्तन गर्न, अर्को कम्पनीमा काम गर्न, परिवारका सदस्यलाई अवैध रूपमा सँगै राख्न, मलेसियामा विवाह गर्न तथा रोजगार पासको दुरुपयोग गर्न पाउने छैनन्।

त्यस्तै, कुनै पनि कानुनविपरीत गतिविधिमा संलग्न भए कडा कारबाही हुने चेतावनी दिइएको छ।

नियम उल्लङ्घन गर्ने विदेशी कामदारलाई पक्राउ, हिरासत, जरिवाना, रोजगार पास रद्द तथा स्वदेश फिर्ता अर्थात् डिपोर्टसम्म गरिन सक्ने मलेसिया अध्यागमन विभागले जनाएको छ।

मलेसियामा सुरक्षित र कानुनी रूपमा काम गर्नका लागि आफ्नो रोजगार पासका सबै सर्तहरू बुझेर पालना गर्न आवश्यक रहेको विभागको भनाइ छ।

विशेषगरी नेपाली श्रमिकहरूले कम्पनी परिवर्तन, अतिरिक्त काम वा गैरकानुनी गतिविधिमा संलग्न हुनुअघि कानुनी अवस्था बुझ्नुपर्ने सरोकारवालाहरूले बताएका छन्।

“कानुन पालना गरौँ, कडा कारबाहीबाट बचौँ” भन्ने सन्देशसहित मलेसियाले विदेशी कामदारलाई जिम्मेवार र कानुनी दायराभित्र रहेर काम गर्न आग्रह गरेको छ।