संयुक्त राष्ट्र सङ्घले आर्टिफिसियल इन्टेलिजेन्स–एआईका कारण विश्वमा ठुलो सङ्ख्यामा रोजगार कटौती हुन सक्ने चेतावनी दिएको छ ।

राष्ट्र सङ्घीय व्यापार र विकास एजेन्सी यूएनसीटीएडीले एक प्रतिवेदन जारी गर्दै एआईका कारण विश्वभर ४० प्रतिशत रोजगारी गुम्ने देखिएको भनेको हो । सन् २०३३ सम्ममा एआईको विश्वव्यापी बजार ४ दशमलव ८ ट्रिलियन डलर पुग्ने अनुमान गरिएको छ ।

अर्थात्, सन् २०३३ सम्ममा विश्वको तेस्रो ठुलो अर्थतन्त्र भएको जर्मनीको भन्दा ठुलो बजार एआईको हुने छ । एआईको असर कम विकसित वा विकाससिल देशहरुको दाँजोमा विकसित देशमा बढी पर्ने समेत आँकलन छ ।

यद्यपि, एआईले अर्थतन्त्रहरू परिवर्तन गर्दै विशाल अवसरहरू सिर्जना गर्ने प्रक्षेपण छ । तर नयाँ आउने त्यस्ता अवसरहरुमा समेत संसारका निश्चित केही मानिसको अधीन हुने सम्भावना रहेको औँल्याइएको छ ।

त्यसले विद्यमान असमानतालाई गहिरो बनाउने जोखिम रहेको बताइएको छ । यसले गर्दा देशहरूले प्रविधिमा लगानी बढाउँदा त्यसको असर न्यूनीकरणमा समेत ध्यान दिन जरुरी रहेको बताइएको छ ।