कुवेतको स्वास्थ्य मन्त्रालयले सरकारी अस्पताल र विशेषीकृत उपचार केन्द्रहरूमा बिरामीको आराम र उपचारको गुणस्तर सुधार्ने उद्देश्यसहित नयाँ व्यवस्था लागू गरेको छ। मन्त्रालयका अनुसार अब वार्डहरूमा हरेक दिन राति १० बजेदेखि बिहान ६ बजेसम्म ‘शान्त समय’ लागू हुनेछ। यो निर्णय बिरामीलाई आराम, निद्रा र मानसिक सान्त्वना मिल्ने वातावरण तयार गर्न ल्याइएको हो।

कुवेत स्वास्थ्य मन्त्रालयका उपसचिव शेख डा. सलमान अल-खालिफाले बिरामीको सहजता उपचारको महत्त्वपूर्ण हिस्सा भएको भन्दै शान्त, सुरक्षित र मनोवैज्ञानिक रूपमा सहयोगी वातावरणले स्वास्थ्य सेवा, बिरामीको अनुभव र निको हुने प्रक्रियामा सकारात्मक प्रभाव पार्ने बताएका छन्। उनका अनुसार सरकारले विश्वस्तरीय अभ्यासअनुसार सरकारी अस्पतालका भर्ना भएका बिरामीको वातावरण सुधार गर्न यो कदम चालेको हो।

नयाँ नियमअनुसार राति १० बजेदेखि बिहान ६ बजेसम्म वार्डमा अनावश्यक रूपमा बिरामी नबिउँझिने गरी नर्सिङ प्रक्रिया, परीक्षण र आपतकालीन नभएका उपचार व्यवस्थापन गर्नुपर्नेछ। यो व्यवस्था चिकित्सक, नर्स, सरसफाइ, पोषण, मर्मत र यातायात सेवासम्बन्धी सबै कर्मचारीमाथि लागू हुनेछ। तथापि, सघन उपचार कक्ष र आपतकालीन विभागलाई भने यो नियमबाट छुट दिइएको छ।

मन्त्रालयले भेटघाट समयसमेत व्यवस्थित गरेको छ। अब बिरामीलाई भेट्न दिउँसो ३ बजेदेखि राति ८ बजेसम्म अनुमति हुनेछ, जसले उपचाररत बिरामीलाई सामाजिक समर्थन पनि दिने र संक्रमण नियन्त्रण तथा उपचार वातावरण शान्त राख्ने उद्देश्य पनि पूरा गर्ने मन्त्रालयको भनाइ छ। सार्वजनिक बिदामा बिहान ९ बजेदेखि दिउँसो १ बजेसम्म पनि भेटघाट गर्न पाइनेछ भने पवित्र रमजान महिनामा भेटघाट समय राति ९ बजेसम्म विस्तार गरिनेछ।

साथै, बिरामीसँग बस्ने सहयोगी व्यक्तिका लागि पनि नयाँ मापदण्ड तय गरिएको छ। मन्त्रालयले बिरामीलाई सघाउन आवश्यकताअनुसार एउटै लिङ्गको एक जना सहयोगी राख्न सकिने जनाएको छ। मानवीय वा सामाजिक कारण देखिएमा मेडिकल बोर्ड प्रमुखले लिङ्गसम्बन्धी सर्तमा अपवाद दिन सक्ने अधिकार पनि राख्ने व्यवस्था गरिएको छ।

यो निर्णयले कुवेतका सरकारी अस्पतालमा उपचारका क्रममा बढी अनुशासन, शान्त वातावरण र बिरामीकेन्द्रित सेवा प्रवर्द्धन गर्ने मन्त्रालयको अपेक्षा छ। मन्त्रालयका अनुसार यो कदम उपचारलाई अझ मानवोचित, सुरक्षित र प्रभावकारी बनाउने दिशामा गुणात्मक परिवर्तन हो।

नेपाली समुदायका लागि यो खबर विशेष रूपमा महत्त्वपूर्ण छ, किनभने कुवेतमा उपचाररत नेपाली बिरामी, उनीहरूका आफन्त र सहयोगीहरूले अब अस्पतालको भेटघाट समय, सहयोगी बस्ने नियम र रातिको शान्त समयबारे पहिल्यै जानकारी राख्नुपर्नेछ। यसले अनावश्यक झन्झट घटाउने र अस्पतालभित्रको प्रक्रिया बुझेर चल्न मद्दत गर्ने देखिन्छ।