कुवेतमा ७० भन्दा बढी विदेशी श्रमिक देशनिकालाको तयारीमा
आप्रवासन
कुवेतले श्रम तथा रेसिडेन्सी कानुन उल्लंघन गर्ने ७० भन्दा बढी विदेशी श्रमिकलाई देशनिकाला गर्ने प्रक्रिया अघि बढाएको छ। कुवेतको सार्वजनिक श्रम प्राधिकरण (Public Authority for Manpower–PAM) ले विशेष अनुगमन अभियानका क्रममा कानुनविपरीत काम गरिरहेका विदेशी श्रमिकलाई पक्राउ गरी निष्कासन प्रक्रिया सुरु गरेको जनाएको हो।
अरब टाइम्सका अनुसार कारबाहीमा परेका अधिकांश विदेशी श्रमिक वैधानिक काम अनुमति बिना अन्य रोजगारमा संलग्न रहेको, रोजगारदाता परिवर्तनसम्बन्धी नियम उल्लंघन गरेको वा श्रम तथा रेसिडेन्सी कानुनविपरीत काम गरेको आरोपमा पक्राउ परेका हुन्।
श्रम प्राधिकरणले सम्बन्धित रोजगारदाता तथा कम्पनीमाथि पनि अनुसन्धान अघि बढाएको जनाएको छ। नियम उल्लंघनमा संलग्न कम्पनीमाथि प्रशासनिक कारबाही, श्रमिक भर्नामा प्रतिबन्ध तथा कानुनी प्रक्रिया अगाडि बढाइने चेतावनीसमेत दिइएको छ।
कुवेत सरकारले पछिल्ला महिनाहरूमा श्रम बजार व्यवस्थित बनाउन, अवैध रोजगारी नियन्त्रण गर्न तथा रेसिडेन्सी नियमको प्रभावकारी कार्यान्वयनका लागि नियमित निरीक्षण अभियान सञ्चालन गर्दै आएको छ। यस्ता अभियानमा श्रम कानुन उल्लंघन गर्ने विदेशी श्रमिक मात्र होइन, उनीहरूलाई गैरकानुनी रूपमा काममा लगाउने रोजगारदातामाथि पनि कारबाही भइरहेको छ।
कुवेत नेपाली श्रमिकको प्रमुख वैदेशिक रोजगारी गन्तव्यमध्ये एक भएकाले त्यहाँ कार्यरत नेपालीहरूले आफ्नो रेसिडेन्सी, कार्य अनुमति तथा रोजगार सम्झौता पूर्ण रूपमा कानुनअनुसार अद्यावधिक राख्नुपर्ने आवश्यकता फेरि एकपटक देखिएको छ। श्रम विज्ञहरूले पनि भिसाको उद्देश्यविपरीत काम गर्नु वा रोजगारदाता परिवर्तन गर्दा कानुनी प्रक्रिया पूरा नगर्नु देशनिकालासम्म पुग्न सक्ने भन्दै सचेत रहन आग्रह गरेका छन्।
