चीनद्वारा नेपाललाई पाँचौँ किस्ताको आपत्कालीन राहत सामग्री हस्तान्तरण

चीन सरकारले उपलब्ध गराएको पाँचौँ किस्ताको आपत्कालीन राहत सामग्री काठमाडौँ आइपुगेको छ। 

शुकबार दिउँसो चिनियाँ जनमुक्ति सेनाको वायुसेवाको वाई-२०ए ठुलो ट्रान्सपोर्ट विमानमार्फत सो राहत सामग्री काठमाडौँस्थित त्रिभुवन अन्तर्राष्ट्रिय विमानस्थलमा ल्याइएको हो।

विमानस्थलमा आयोजित राहत सामग्री हस्तान्तरण समारोहमा नेपालका लागि चिनियाँ राजदूत झाङ माओमिङ र विज्ञान, प्रविधि तथा नवप्रवर्तन मन्त्री महावीर पुन सहभागी भएका थिए।

विपत् राहत कार्य अघि बढिरहेका बेला नेपालको सबैभन्दा अत्यावश्यक आवश्यकतालाई ध्यानमा राखेर यो राहत सामग्री ल्याइएको हो। यस किस्तामा मुख्य रूपमा डिजेल जेनरेटर, मेडिकल मास्क, शव राख्ने फ्रिजर (मर्चुरी फ्रिजर), डीएनए परीक्षण उपकरण र रियाजेन्ट तथा जल उद्धार सामग्री समावेश छन्। 

यी सामग्रीले नेपालको आगामी उद्धार तथा राहत सञ्चालनलाई प्रभावकारी रूपमा अगाडि बढाउन ठुलो सहयोग पुर्‍याउने अपेक्षा गरिएको छ।