यूएईमा नेपालीका लागि राहदानी घरमै डेलिभरी हुने, इमिरेट्स पोष्टमार्फत सेवा
आप्रवासन
काठमाडौं । संयुक्त अरब इमिरेट्स (यूएई) मा रहेका नेपाली नागरिकले अब नयाँ राहदानी लिनका लागि नेपाली महावाणिज्यदूतावास, दुबईसम्म स्वयं पुग्नुपर्ने बाध्यता हट्ने भएको छ। नेपाली महावाणिज्यदूतावास, दुबईले नयाँ बनेर आएको राहदानी सम्बन्धित आवेदककै ठेगानामा हुलाकमार्फत पठाउने व्यवस्था गरेको हो।
महावाणिज्यदूतावासले शुक्रबार जारी गरेको सूचनाअनुसार, राहदानी लिनकै लागि कार्यालयसम्म आउँदा सेवाग्राहीलाई बिदा मिलाउनुपर्ने, समय खर्च हुने तथा यात्रा खर्चसमेत लाग्ने भएकाले हुलाकमार्फत राहदानी उपलब्ध गराइदिन सेवाग्राहीबाट निरन्तर अनुरोध हुँदै आएको थियो। सोही अनुरोधलाई ध्यानमा राख्दै अब यूएईको सरकारी हुलाक सेवा इमिरेट्स पोष्टमार्फत राहदानी डेलिभरी गर्ने व्यवस्था मिलाइएको हो।
यो व्यवस्था अबदेखि महावाणिज्यदूतावासमा राहदानी आवेदन दिने सेवाग्राहीका लागि लागू हुनेछ। राहदानीका लागि आवेदन दिँदा बायोमेट्रिक विवरण दिने समयमा नै सम्बन्धित आवेदकले महावाणिज्यदूतावासमा राहदानी डेलिभरी फाराम भर्नुपर्नेछ।
आवेदन प्रक्रिया पूरा भएपछि राहदानी नेपालबाट बनेर महावाणिज्यदूतावासमा आएपछि डेलिभरीका लागि इमिरेट्स पोष्टलाई जिम्मा दिइनेछ। त्यसपछि इमिरेट्स पोष्टले सम्बन्धित आवेदकले फाराममा उपलब्ध गराएको ठेगानामा राहदानी पुर्याउनेछ।
राहदानी डेलिभरीका लागि छुट्टै शुल्क लाग्नेछ। राहदानी प्राप्त गर्ने समयमा सेवाग्राहीले इमिरेट्स पोष्टलाई डेलिभरी शुल्कबापत १५ दिराम बुझाउनुपर्नेछ। उक्त शुल्कमा मूल्य अभिवृद्धि कर (भ्याट) जोडिँदा कुल १५.७५ दिराम तिर्नुपर्ने महावाणिज्यदूतावासले जनाएको छ।
महावाणिज्यदूतावासका अनुसार यो राहदानी डेलिभरी सेवा अनिवार्य भने गरिएको छैन। राहदानी लिनका लागि महावाणिज्यदूतावासमै उपस्थित हुन चाहने सेवाग्राहीले नियमित प्रक्रियाअनुसार राहदानी लिन सक्नेछन् भने हुलाकमार्फत घर वा आफूले दिएको ठेगानामा राहदानी प्राप्त गर्न चाहने सेवाग्राहीले मात्र यो सेवा प्रयोग गर्न सक्नेछन्।
विशेषगरी यूएईका विभिन्न स्थानमा बसोबास गरिरहेका नेपालीका लागि राहदानी लिन दुबईसम्म यात्रा गर्नुपर्ने समय र खर्च घटाउन यो सेवाले सहजता प्रदान गर्ने अपेक्षा गरिएको छ। सेवाग्राहीले राहदानी आवेदन दिँदा नै डेलिभरी सेवा आवश्यक पर्ने वा नपर्नेबारे निर्णय गर्नुपर्नेछ।
नेपाली महावाणिज्यदूतावास, दुबईले यो सूचना असोज ९, २०८३ अर्थात् सेप्टेम्बर २५, २०२६ मा जारी गरेको हो।
