ओमानमा रहेका नेपालीसहितका आप्रवासीले रेसिडेन्स कार्डको म्याद छान्न पाउने भएका छन् ।

शाही ओमान प्रहरीले आप्रवासीहरूको रेसिडेन्स कार्डका सम्बन्धमा नयाँ सुविधा घोषणा गरेको हो ।

जस अनुसार अब आप्रवासी कामदारहरूले एक, दुई वा तीन वर्षको वैधता भएको रेसिडेन्स कार्डहरूमध्ये आफूलाई उपयुक्त छनौट गर्न सक्छन्।

जसमध्ये एक वर्षको म्याद भएको रेसिडेन्स कार्ड छान्दा ५ ओमान रियाल शुल्क लाग्ने छ ।

यस्तै, २ वर्षको १० र ३ वर्षको म्याद भएको कार्डका लागि १५ ओमान रियाल शुल्क तोकिएको छ।

एक ओमान रियाल भनेको ३६४ नेपाली रुपैयाँ बराबर हो ।

रेसिडेन्स कार्ड हराएको वा बिग्रिएको भए २० रियाल शुल्क लाग्नेछ।

ओमानमा आप्रवासीहरूले आवासीय कार्डको म्याद सकिएको ३० दिन भित्र नवीकरण गर्नुपर्दछ ।

नयाँ सुविधाले आप्रवासीहरूको बसाई र नियमनलाई थप व्यवस्थित बनाउने ओमान प्रहरीको भनाई छ ।

ओमानमा करिब १८ लाख आप्रवासीहरू कार्यरत छन् ।

जसमध्ये धेरैजसो अर्थात् १४ लाख निजी क्षेत्रमा कार्यरत छन् ।

ओमानमा ३ लाख ४९ हजार आप्रवासी घरेलु कामदारका रूपमा कार्यरत छन् ।

ओमानमा २० हजार हाराहारीमा नेपालीहरू कार्यरत रहेको अनुमान छ ।