साउदीमा विदेशी श्रमिक स्थानान्तरण प्रक्रिया सहज, नयाँ अनलाइन सेवा सुरु

साउदी अरबले विदेशी श्रमिकलाई निजी क्षेत्रका कम्पनीबाट व्यक्तिगत रोजगारदातासँग सरुवा गर्न अनुमति दिने नयाँ अनलाइन सेवा सुरु गरेको छ। मानव संसाधन तथा सामाजिक विकास मन्त्रालय (MHRSD) ले सुरु गरेको यो सेवा निश्चित सर्त पूरा गर्ने विदेशी श्रमिकलाई कम्पनीबाट घरेलु व्यवसाय वा व्यक्तिगत रोजगारदाताको रोजगारीमा कानुनी रूपमा स्थानान्तरण गर्न लक्षित गरिएको हो।

गल्फ न्युजका अनुसार यो सेवा मन्त्रालयको विद्युतीय प्लेटफर्ममार्फत उपलब्ध हुनेछ। नयाँ व्यवस्थाअनुसार रोजगारदाता र श्रमिक दुवैले तोकिएका कानुनी मापदण्ड पूरा गरेपछि मात्रै स्थानान्तरण स्वीकृत हुनेछ। यसबाट श्रमिकको सरुवा प्रक्रिया थप व्यवस्थित, पारदर्शी र डिजिटल प्रणालीमार्फत सञ्चालन हुने सरकारको विश्वास छ।

मन्त्रालयले यो व्यवस्था श्रम बजारलाई व्यवस्थित बनाउने, विदेशी श्रमिकको कानुनी हैसियत सुरक्षित गर्ने तथा रोजगारदाताबीच श्रमिक स्थानान्तरणलाई स्पष्ट कानुनी प्रक्रियाभित्र ल्याउने उद्देश्यले लागू गरिएको जनाएको छ। स्थानान्तरणका लागि सम्बन्धित रोजगारदाता, श्रमिकको कानुनी अवस्था तथा श्रम सम्झौतासम्बन्धी आवश्यक सर्तहरू पूरा भएको हुनुपर्नेछ।

साउदी सरकारले पछिल्ला केही वर्षदेखि श्रम बजारलाई आधुनिकीकरण गर्दै विदेशी श्रमिकसम्बन्धी विभिन्न डिजिटल सेवा विस्तार गरिरहेको छ। रोजगार सम्झौता, कार्य अनुमति, सेवा स्थानान्तरण तथा श्रमिक अधिकारसँग सम्बन्धित धेरै प्रक्रिया क्रमशः अनलाइन प्रणालीमा रूपान्तरण गरिएका छन्।

साउदी अरब नेपाली श्रमिकको प्रमुख वैदेशिक रोजगार गन्तव्यमध्ये एक भएकाले यो नयाँ व्यवस्थाले त्यहाँ कार्यरत नेपाली श्रमिकलाई पनि कानुनी प्रक्रियाअनुसार रोजगारदाता परिवर्तन वा सरुवाको थप व्यवस्थित विकल्प उपलब्ध गराउने अपेक्षा गरिएको छ। यद्यपि मन्त्रालयले सरुवा सबै विदेशी श्रमिकका लागि स्वतः लागू नहुने र तोकिएका योग्यता तथा सर्त पूरा गरेपछि मात्रै सेवा उपयोग गर्न सकिने स्पष्ट गरेको छ।